Opin málfundur: Er skynsamlegt að leggja aðildarumsókn Íslands að ESB til hliðar?

Áskorun skynsemi.is til Alþingis hefur komið af stað umræðunni um framtíð aðildarumsókn Íslands að ESB. Heimssýn og Herjan – félag stúdenta gegn ESB-aðild, standa því fyrir opnum málfundi um hvort leggja skuli aðildarumsókn Íslands að ESB til hliðar. Fundurinn verður haldinn miðvikudag 28. september klukkan 12:00-13:00 í Háskóla Íslands, Lögbergi – stofu 102.

Viðburðurinn er opin öllum.

Verið velkomin!

 

Frummælendur verða:

Bjarni Benediktsson

Formaður Sjálfstæðisflokksins

 

 

 

Sigmundur Davíð Gunnlaugsson

Formaður Framsóknarflokksins

 

 

 

Steingrímur J. Sigfússon

Fjármálaráðherra og

Formaður Vinstrihreyfingarinnar græns framboðs   

 

Valgerður Bjarnadóttir

Varaformaður utanríkismálanefndar og

 Þingmaður Samfylkingarinnar

Hættið þessu rugli

Nú hlýtur öllum – líka hinum hörðu ESB sinnum – að vera það orðið ljóst hversu mikið feigðarflan það var að ana af stað í viðræður við ESB án þess að hafa fengið til þess skýrt umboð þjóðarinnar. Því þó kosningar hafi verið ný afstaðnar þegar ákvörðunin var tekin og meirihluti Alþingis samþykkt aðildarumósknina, þá var það í raun gert með fölsunum gagnvart þjóðinni. 

 

Sá stjórnmálaflokkur sem í raun tryggði það að aðildarumsóknin var send, braut þar með trúnað sinn við kjósendur. VG hafði nefnilega háð kosningabaráttu sína á vagni eindreginnar andstöðu við aðildarumsókn. Þingmenn hans og frambjóðendur  fóru um allar grundir landsins og hvísluðu í eyru kjósenda og básúnuðu á torgum, að þeim einum væri treystandi þegar kæmi að staðfestu í andstöðu við ESB aðild.

Því miður ginu alltof margir við þeirri flugu. Þetta fólk hefur nú verið svikið í hinum pólitísku tryggðum og bíður nú færis til þess að launa lambið gráa.

Umsóknin og allt það bix er orðin að hreinum skrípaleik. Jafnvel hinir eindregnustu ESB sinnar fyrirverða sig. Erlendir sendimenn sem koma hingað til lands til þess að kynna sér málin, vita ekki hvað á þá stendur veðrið. Þeir fara héðan  og telja sig vita ennþá minna um þetta mál, en þeir álitu þegar þeir komu hingað.

Það er hins vegar ekki að undra þótt þetta ágæta fólk leggi kollhúfur , eftir að hafa farið á milli manna til þess að reyna að átta sig á hvað í ósköpunum sé eiginlega á ferðinni, þegar ESB málið er annars vegar. Þeir skilja það ekki, stjórnvöld vita það ekki og við hin horfum á í forundran og biðjum þess að menn hætti þessu rugli.

En það þarf svo sem engan að undra. Nú er rýnivinnan búin og komið að alvöru málsins. Nú er verið að byrja samningaviðræður. Hið yfirlýsta markmið er að ljúka þeim með samningi. En þá byrja vandræðin. Um hvað ætla menn að semja? Hvernig á að svara sendimönnum ESB? Það veit enginn. Ríkisstjórnin svarar út og suður og veit ekkert í sinn haus.  Þessum ósköpum verður að linna áður en meiri skaði er skeður.

 

Greinin birtist á bloggi Einars K. Guðfinnssonar 14.09.2011, og má finna hér.

Skynsemi.is vill leggja aðildarumsókn til hliðar

Hafið undirskriftaátak á vefsíðunni skynsemi.is vegna áskorunar á Alþingi. Skorað er á Alþingi að leggja aðildarumsókn í Evrópusambandið til hliðar.

Aðstandendur átaksins telja skynsamlegt að leggja aðildarumsókn til hliðar, ekki síst vegna þess hve evrópusambandið hefur tekið miklum breytingum frá því Alþingi samþykkti umsóknina. Evrópa glímir við skuldakreppu og óvissa ríkir um evruna. Einnig sýna skoðanakannanir að meirihluti landsmanna vill draga umsóknina til baka. Að svo stöddu sé því ráðlegast að leggja umsóknina til hliðar.

Heimssýn hvetur alla félagsmenn til að taka þátt í þessari áskorun.