Vel sóttur fundur

Heimssýn hélt í dag fund um stöðu aðildarumsóknar Íslands að ESB undir fyrirsögninni “Er ESB-umsóknin dauð?”. Var fundurinn vel sóttur, en þar mættu vel á fjórða tug manns.

Umræður voru bæði fróðlegar og málefnalegar. Styrmir Gunnarsson var þeirrar skoðunar að aðildarumsókn Íslands að ESB væri “pólítískt dauð”, eins og hann orðaði það, meðal annars vegna þeirrar andstöðu við hana sem upp er komin og vegna “skorts á dýnamískri umræðu um sambandið” og að “umræðan hefur takmarkast við umræðu um gjaldmiðilinn og evruna”. Nánar

Er ESB-umsóknin dauð?

Heimssýn – hreyfing sjálfstæðissinna í Evrópumálum, mun halda opinn hádegisfund undir fyrirsögninni „Er ESB-umsókin dauð?“. Fundarstaður  er  Thorvaldsen í Austurstræti 8-10 í Reykjavík, fimmtudaginn 20. september klukkan 12:00.

Lítill stuðningur er á bak við aðildarumsókn Íslands, hvorki á alþingi né meðal kjósenda. Af fjórum stjórnmálaflokkum á alþingi eru þrír á móti aðild Íslands. Í samfélaginu eru engir kraftar, sem orð er á gerandi, er vinna að framgangi umsóknarinnar. Ágreiningur  ríkir milli Íslands og Evrópusambandsins um makrílveiðar, og sitja Íslendingar undir hótunum um viðskiptaþvinganir. Óeining er innan ríkisstjórnarinnar um ESB-umsóknina og aðlögunarferlið. Þá er gjaldmiðill Evrópusambandsins, evran, í djúpri og alvarlegri kreppu sem ekki sér fyrir endann á. Evran hefur verið helsta röksemd aðildarsinna en núna er hún dragbítur.

Frummælendur verða Styrmir Gunnarsson, fyrrverandi ritstjóri, og Mörður Árnason, alþingismaður. Að loknum erindum frummælenda verður opnað á spurningar úr sal. Fundarstjóri verður formaður Heimssýnar, Ásmundur Einar Daðason, og er fundurinn opinn öllum.

(á facebook)