Heimssýn Suðurlandi

Heimssýn Suðurland, aðildarfélag Heimssýnar á Suðurlandi, var stofnað á opnum fundi um Evrópumál sem samtökin stóðu fyrir í Þingborg 9. júní 2009. Þar kom fram áhugi á að leggja lið baráttunni fyrir áframhaldandi fullveldi Íslands sem og áhyggjur fundarmanna af stöðu mála undir núverandi ríkisstjórn.

Frummælendur á fundinum voru fulltrúar frá samtökunum Nei til EU í Noregi og fulltrúar þriggja stjórnmálaflokka, Sigurður Ingi Jóhannsson alþingismaður frá Framsóknarflokki, Atli Gíslason alþingismaður frá Vinstrihreyfingunni – grænu framboði og Eyþór Arnalds framkvæmdastjóri og bæjarfulltrúi frá Sjálfstæðisflokki. Fram kom í máli Dag Seierstad, sem er norskur sérfræðingur í málefnum Evrópusambandsins, að í samningaviðræðum við Evrópusambandið hafi Norðmenn ekki engar varanlegar undanþágur fengið frá regluverki sambandsins. Það hafi heldur ekki verið niðurstaðan við inntöku annarra landa og engar líkur geti talist á að Ísland breyti meginreglum Evrópusambandsins.

Fulltrúar stjórnmálaflokkanna töluðu gegn aðild og fram kom í máli Sigurðar Inga að nýlega framkomin þingsályktunartillaga gengi gegn flokkssamþykkt Framsóknar og fengi því ekki stuðning þingamanna flokksins.

Í lok fundarins í Þingborg var skipuð bráðabirgðastjórn fyrir aðildarfélag Heimssýnar á Suðurlandi. Hana skipa eftirtaldir:

  •     Eyþór Arnalds bæjarfulltrúi og framkvæmdastjóri í Árborg
  •     Guðni Ágústsson fv. ráðherra, Selfossi,
  •     Þór Hagalín framkvæmdastjóri Eyrarbakka,
  •     Sigurlaug B. Gröndal skrifstofumaður Þorlákshöfn
  •     Axel Þór Kolbeinsson tölvumaður Hveragerði.