Segjum Nei takk, því við viljum ekki ganga í ESB
Við viljum ekki framselja löggjafarvald, framkvæmdavald og dómsvald úr landi og höfnum viðræðum sem fela í sér skref í þá átt. Meirihluti landsmanna vill ekki ganga í ESB, meirihluti þingmanna er andvígur aðild og einn af ríkisstjórnarflokkunum er andvígur aðild. Við þessar aðstæður geta aðildarviðræður vart skilað árangri.
Segjum Nei takk því aðildarviðræður geta ekki leitt til ávinnings
Ísland hefur nú þegar aðgang að innri markaði ESB og á í nánu samstarfi við aðildarríkin. Ísland yrði fyrsta landið í áratugi sem hefur aðildarviðræður án þess að hafa fjárhagslegan hag af aðild. Ísland myndi greiða margfalt meira til ESB en það fengi til baka. Ísland þyrfti sjálft að ná tökum á vöxtum og verðbólgu til að fá að taka upp evru.
Segjum Nei takk við milljarða sóun
Kostnaðaráætlun ríkisins er að beinn útlagður kostnaður við aðildarviðræður muni nema um tveimur milljörðum króna. Það gæti verið verulegt vanmat. Til viðbótar koma svo launagreiðslur og annar kostnaður sveitarfélaga, samtaka og fyrirtækja sem þurfa að leggja fram mikla vinnu í þessu umfangsmikla ferli.
Segjum Nei takk við óvissu
Aðildarferli er skref í átt að gjörbreyttu umhverfi fyrir undirstöðuatvinnuvegi landsins. Þeir sem hyggja á fjárfestingu í innlendum atvinnugreinum svo sem landbúnaði, matvælaframleiðslu, fiskvinnslu og fleiri greinum sjá fram á aukna óvissu.
Segjum Nei takk við biðstöðu
Önnur ríki munu fresta viðræðum um fríverslun við ríki sem er á leið inn í ESB. Kína sleit viðræðum um fríverslunarsamninga eftir að Ísland lagði inn aðildarumsókn árið 2009. Viðræður um fríverslun við Grænland, Bandaríkin og önnur lönd fara í bið.
Segjum Nei takk við rangri forgangsröð
Reynslan sýnir að aðildarviðræður kalla á vinnu hjá ráðuneytum, ríkisstofnunum, sveitarfélögum, aðilum vinnumarkaðar og hagsmunasamtökum. Þetta mun draga mikla athygli og orku frá mikilvægari verkefnum.
Segjum Nei takk við óljósu umboði
Í aðildarviðræðunum sem hófust 2009 samþykkti Alþingi skýr markmið og línur sem ríkisstjórnin mátti ekki víkja frá í aðildarviðræðum. Ríkisstjórninni var einnig skylt að upplýsa Alþingi reglulega um gang viðræðna. Segi þjóðin já í ágúst verða þessi markmið aðeins höfð til hliðsjónar og ríkisstjórn þarf ekki að hafa Alþingi með í ráðum.
Segjum Nei takk við kerfi sem krefst sífellt meira valdaframsals
Samrunaþróun hefur einkennt Evrópusambandið. Sérhver nýr sáttmáli hefur fært meira vald frá aðildarríkjunum til sambandsins. Neitunarvald ríkja hefur verið fellt niður í sífellt fleiri málaflokkum og dregið hefur verið úr áhrifum fámennari ríkja. Leiðtogar ESB tala fyrir myndun sambandsríkis með sameiginleg fjárlög og her. Líklegt er að þessi þróun haldi áfram og jafnvel hraðar en fyrr, eftir brotthvarf Breta úr sambandinu.
Segjum Nei takk við því að kljúfa þing og þjóð
Nei takk í ágúst leggur málið til hliðar, en já þýðir að tekist verður á um framtíð Íslands af vaxandi þunga næstu misseri og ár. Aðildarviðræður við ESB ættu ekki að vera á dagskrá nema aukinn meirihluti landsmanna hafi áhuga á aðild og meirihluti sé fyrir aðild á Alþingi.